KUMARANASAN

നാട്ടരങ്ങിന്റെ നാളുകൾ  (2 )

ഞാൻ  എം.എ യ്ക്ക് പഠിക്കുന്ന കാലം .  യുവകലാ സാഹിതിയുടെ കരമന യൂണിറ്റിന്റെ  പ്രെസിഡന്റാണ്‌ അന്ന്. സെക്രെട്ടറി സക്കീർ ഹുസൈൻ . എന്റെ ജൂനിയറായി യൂണിവേഴ്സിറ്റി കോളേജിൽ പഠിക്കുന്നു.

യൂണിറ്റിന്റെ  ഉദ്ഘാടനം കഴിഞ്ഞിട്ടില്ല.  ആയിടയ്ക്ക്  സാഹിതിയുടെ ഒരു യോഗത്തിൽ വച്ച് ശ്രീ  തിക്കുറിശ്ശിയുടെ   രൂപ സാദൃശ്യമുള്ള  ഒരാളെ കണ്ടുമുട്ടി. സംഘടനയുടെ  സംസ്ഥാന വൈസ് പ്രസിഡന്റ് ആണത്രേ. അദ്ദേഹം പറയുന്നു:

 “ ഒരു വരി കവിതയോ കഥയോ എഴുതിയ  ആരെയും  സാഹിത്യകാരനായി അംഗീകരിക്കാൻ ഞാൻ തയ്യാറാണ് !”

കൊള്ളാമല്ലോ കക്ഷി  !

തീർന്നില്ല...,അടുത്ത  വാചകം. ഇങ്ങനെ :

“നിങ്ങൾ എന്നെ വിളിക്കു , എവിടെ വേണമെങ്കിലും വിളിക്കൂ .., ഞാൻ വരാം പ്രസംഗിക്കാനും   കവിത ചൊല്ലാനും ഒക്കെ  ഞാൻ റെഡി .  നിങ്ങൾ എനിക്ക് ഒരു ചിലവും ചെയ്യണ്ട !”

 അതും കൊള്ളാമല്ലോ !!

 ഇവിടെ, യൂണിറ്റ് ഉദ്ഘാടനത്തിന് ആരെ വിളിക്കും എന്ന് വിഷമിച്ചിരിക്കുമ്പോഴാ  ഇങ്ങനെ ഒരു വിദ്വാനെ ദൈവം മുന്നിൽ കൊണ്ട് നിർത്തിയിരിക്കുന്നത് !. ആരോടും ആലോചിക്കാൻ നിന്നില്ല . കയ്യോടെ ബുക്ക് ചെയ്തു. വരുന്ന ഞായറാഴ്ച വൈകുന്നേരം അഞ്ചു മണി.  വായനശാലാ ഹാളിൽ വച്ച് .

സ്ഥലവും  വിലാസവുമെല്ലാം കൃത്യമായി പറഞ്ഞു കൊടുത്തു. സമയത്തു്   അങ്ങ് എത്തിയാൽ മതി.

അദ്ദേഹം  ഒന്ന് പതറിയത്പോലെ! പറഞ്ഞത് അബദ്ധമായിപ്പോയെന്നു തോന്നിക്കാണണം !!  ഇത്ര പെട്ടെന്ന്  ശിക്ഷ കിട്ടുമെന്ന് കരുതിയിരിക്കില്ല . പോകാൻ നേരത്താണ് അത്   ഓർമ വന്നത്.  പേര് ചോദിച്ചില്ലല്ലോ ?

 "സാറിന്റെ   പേര് എങ്ങനെ നോട്ടീസിൽ വയ്ക്കണം ?"

 "ഡോക്ടർ . എഴുമംഗലം  കരുണാകരൻ."

മതി. പിന്നെ നിന്നില്ല... മൊബൈലൊന്നും ഇല്ലല്ലോ അന്ന് .

നോക്കാം വരുമോന്ന്.!  എങ്കിലും  ഒരു ധൈര്യത്തിന് ശ്രീ പെരുമ്പുഴ ഗോപാലകൃഷ്ണനെ കൂടെ വിളിച്ചു. അഥവാ, ഈ പുള്ളിക്കാരൻ  എത്താതിരുന്നാൽ പരിപാടി പൊളിയരുതല്ലോ !

എന്റെ തീരുമാനം മറ്റു ഭാരവാഹികൾ അംഗീകരിച്ചു.  തലേന്ന് പത്രങ്ങളിൽ വാർത്തയും കൊടുത്തു. നോട്ടീസിൽ 'ഏഴു' മംഗലം എന്നാണു അച്ചടിച്ചിരുന്നത് . അത് കണ്ടിട്ട് അച്ഛൻ പറഞ്ഞു  എഴുമംഗലം  ആയിരിക്കും . അല്ലാതെ , എഴു  മംഗലവും  എട്ടു മംഗലവും ഒന്നും ആവില്ല !

ഏഴായാലും  പത്തായാലും ആള് ഒന്ന് വന്നുകിട്ടിയാൽ മതി !

നാളെയാണ്  പ്രോഗ്രാം.

എനിക്ക് അൽപ്പം  ടെൻഷൻ  ഇല്ലാതില്ല  .

ഞാനാണല്ലോ  സൂത്രധാരൻ.

ഒടുവിൽ 'സൂത്രം ' പൊളിയുമോ ?